Asiya İnfrastruktur İnvestisiya Bankı (AIIB) 2022-ci ilin sonunda kredit portfelinin təxminən 11 %-ni təşkil edən özəl sektor borcalanlarının payının 2032-ci ilə qədər kredit portfelinin təxminən üçdə birinə çatacağını gözləyir.
Bu barədə “Moody’s Investors Service” beynəlxalq reytinq agentliyinin xarici valyutada uzunmüddətli emitent reytinqinin və AIIB-nin yüksək təminatsız reytinqinin “Aaa” səviyyəsində təsdiqlənməsi ilə bağlı hesabatında deyilir.
“Belə dəyişiklik kredit keyfiyyətinə və bütün kredit portfelinin fəaliyyətinə mənfi təsir göstərə bilər”, – agentlik qeyd edir.
“Moody’s” inkişaf etməkdə olan ölkələrdə özəl sektora kredit verilməsini suveren kreditlərin verilməsindən daha riskli hesab edir. Bununla belə, agentlik hesab edir ki, belə bir keçid bankın proqnozlaşdırdığından daha uzun çəkə bilər.
Hesabata əsasən, bank inkişafla əlaqəli aktivlər portfelini növbəti üç il ərzində orta hesabla illik təxminən 16 % və 2023-2028-ci illər arasında təqribən iki dəfə artırmağı hədəfləyir. “Moody’s” likvidlik göstəricilərinin hazırkı yüksək səviyyələrdən zəifləyəcəyini, amma yüksək və ehtiyatla idarə olunan səviyyədə olacağını gözləyir.